عاشوا اطبائنا

بالكويت،أحد افراد اسرتي الكريمة بالكويت عنده مبدأ قديم اسمه عالج نفسك بنفسك
بمعنى ان صعب جدا جدا انه يروح مستوصف المنطقة او انه يبحث عن استشارة طبية، تمر ايام يتلوى من الالم ولا يذوق طعم النوم بدون ما يكلف نفسه يروح الطبيب، طبعا انا كنت اعتبرها سذاجة وتصرف غير حكيم منه ، بس اخر سالفة صارت لي وضحتلي ليش هالشخص يتعييز يروح الطبيب يكشف عليه

يوم الجمعه اللي طاف وانا قاعد ببيت واحد من الربع ياني الم حاد لا يطاق في الصدر، مسكت نفسي ساعه .. ساعتين .. 3 ساعات الالم كل ماله ويزيد، وصل الالم لمرحلة ان صاحبي حس فيني والح علي ان واحد يكشف علي .. الله خير ما قصر قام يوصلني.. طبعا يومها مستوصف المنطقة مصكر فاظطرينا نروح المركز التخصصي ، دشينا، اخذت رقم وكان المفروض ان طبيبي بغرفة رقم 4... دشيت الغرفة رقم اربعه ما لقيت احد .. نطرت عشر دقايق .. ما يا الدكتور .. قلت خل اطل على الغرفة رقم 3 .. طليت ولا اشوف واحد قاعد عالمكتب بالثلاثينات من عمره.. لابس لبس اقرب الى كونه بيجامة بيت من أي شيء اخر .. ومو لابس الكلينيكال كوت الابيض ولا حاط السماعات

انا واقف عند الباب : السلام عليكم

اهو: وعليكم السلام.. نعم اخوي امر
انا: ما يامر عليك عدو .. انا المفروض ادش على الدكتور بالغرفه رقم 4 بس ماكو احد جنه

اهو : تبي تشوف دكتور ؟

أنا : أي والله

اهو : ليش تبي تشوف دكتور

انا : ابي يكشف علي

طبعا كان مفروض اقوله تتوقع ليش بشوف دكتور؟؟ اصور وياه؟


اهو : زين دش

انا : انت طبيب

اهو : أي نعم .. ليش مو راكب علي؟

انا : لامو عن .. بس استغربت مو لابس البالطو الابيض .. ولا حاط السماعات -وكان مفروض اقوله ولابس بيجامة الله يهداك

قعدت على الكرسي

طبعا انا بيني وبين نفسي قلت يمكن قانون يديد طلع بالديرة يسمح للاطباء بعدم ارتداء البالطو الابيض مثل بريطانييا .. ببريطانيا فقط الطلبة هم من يرتدون البالطو الابيض .. ليس الاطباء .. فهناك اعتقاد سائد عندهم ان البالطو الابيض هو سبب لانتقال بعض انواع البكتيريا مثل الام ار اس ايه المؤدية لبعض الامراض المعدية


اهو : امرني .. شنو فيك

انا : والله دكتور الم حاد جدا في الصدر بدى من من اكثر من 3 ساعات

اهو : وين بالظبط

انا : اهني .. هالمنطقة .. اشرتله تقريبا بنص صدري
اهو : اييي هذا طبيعي انت لانك رياضي ... انت رياضي صح ؟؟

انا : لا والله مع الاسف مو رياضي... اللهم العب كرة من وقت لي وقت

اهو : ايييي عدل عدل ، عيل هذا الالم لانك مو رياضي ، انا بكتب لك شي يخفف الالم

انا : بقلبي اقول ... قول والله ؟؟

اهو : في شي ثاني يا اخ فلان

انا : لا مافي شي ثاني .. بس دكتور بسألك... انت ما سألتني اذا ادخن ولالا .. ما طلبت مني اوصف لك الالم .. ما سألتني اذا فيني ربو...ما سألتني عن أي امراض عائلية ... ما شلت سماعتك تفحصني فيها .. ومع هذا عرفت تشخضني .. عموما مشكور ما تقصر

جان امشي اطلع ...

اهو : اخوي.. نسيت الوصفة

الله يالوصفة عاد.. كالعادة بين كيلر

انا : ايي .. مشكور ما قصرت

-----

طبعا اخذت الورقة مني وقطيتها اول ما طلعت

الحين بس اقتنعت بمقولة عالج نفسك بنفسك

وعاشوا اطبائنا